الثلاثاء، 25 مارس 2014

مستنية الاجازة علشان أكتئب

في الواقع أنا لحد دلوقتي متماسكة إلى حد يثير الدهشة..عازلة كل حاجة عني
كل حاجة بتحصلي أنا او للي حوالي أو بتحصلل في البلد
أي حاجة بتستدعي التفكير والحزن\الشفقة\الاحباط\الأمل..أي حاجة بتستهلك أي حاجة مني عازلاها
طول الوقت عمالة تحصل حاجات وحاجات وحاجات وانا عمالة أركنها على جنب واركنها واركنها
لإنه في وضعي ده لو وقعت مش هاقوم ومينفعش ماقومش
مجرد تخزينك لحاجات مش علشان تعملها لاحقا لأ علشان تدركها\تحسها لاحقًا ده شيء في حد ذاته مرهق
أنا حقيقي مستنية أخلص علشان أزعل براحتي علشان افتكر كل حاجة حصلت وركنتها على جنب
وابدأ استوعبها واحسها
وفي الواقع بردو الزعل بيريح..إنه حاجة تحصلك أو تحصل لاي حد وتزعل وتزعل منها وزعلك يروح او ميروحش ده شيء بيريح
حاجة حصلت وراحت لحالها
غير لما تكون عاين الحاجة لوقت..بتهرب منها لحد ما تفضالها !
شيء مقيت
ده بالإضافة إلى إن الواحد لا يستطيع إنه ينكر إنه بطريقة أو بأخرى النتيجة هتضيف سبب لكي نكتئب من أجله إلى الأسباب الأخرى
*تنـــــــــــــــــــــــــــــــــهـــــــيــــــــدة كبيرة*
                                                       "ونقول يارب تكون في العون "

حكي 3

حاسة إني لوحدي..وبغض النظر عن إني بحب العزلة إلا إنني مبحبش ابقا لوحدي
مبحبش احساس اني لما اجي ادور على حد اتسند عليه ملاقيش..
منة كانت بتقول"حاسة إنه..إنه لوحدي..مفيش حد.."
وإيثار كانت قالت مرة إنها بتتكلم بصوت عالي.. بتغني بصوت عالي اعتقادا منها بإنهم سامعينها
أكتر سنة كنت محتاجة فيها حد هي السنة دي
بس هو عامة الواحد لما بيحتاج أي حاجة أي حاجة وقت حاجتها بتختفي!

حكي2

كنت جبت من فترة دفتر نوت صغير علشان أدون فيه الأوقات الحافلة بالأحداث اللي الواحد بيمر بيها حتى لا تُنسى وحتى لا يتدخل العقل الباطن في وقت ما فيُّشوِّهًُهَا ويًحَمِّل أشخاصا دون وجه حق أخطاء آخرين أو يحملك أنت نفسك خطأ ليس بخطاك
إلا إن زحمة الوقت والثانوية العامة منعتني حتى من تدوين حاجات كتير
جدير بالذكر إني متوقفه عن حاجات كتير في سبيل حاجة واحدة وهي ان الشهرين دول بأيام الامتحانات تعدي بسلام
إلا إن عدد الأحداث اللي ممكن تحصل في شهرين أكبر بكثير مما يمكن تخيله والإحساس بعدم الطمأنينة والخوف يترصد بك في كل ثنية وواقع إن الواحد عاجز عن تقديم أي مساعدة وإنه واقف بيتفرج أو إنه منشغل بحاجة تانية ده شيء مقيت
إحساس العجز في حد ذاته شيء مقيت
شهر 6..أرجوك تعالى بسرعة.

حكي1

وفي الواقع الواقع سريالي لدرجة مثيرة للسخرية وقد تخطت أحداثه حد السخرية من الأساس 
ساعات كتير الواحد بيتساءل هي الدنيا كانت مضلمة كده وهو مش شايف ولا هي اللي لسه بدءا تضلم ؟!
سنة كبيسة بأحداثها على المستوى الشخصي والعام..حتى في أحداث الواقع بجله..

الخميس، 6 مارس 2014

رغم السقوط

كطفل صغير لا يكف عن القفز رغبة في التقاط نجمة قد أسرت لبه.
أو كفرخ لم تكف مخالبه الضئيلة عن التشبث في الجدران رغبةً في الخروج
كان هو يقف دومًا رغم السقوط..